Ko ñane retä niko hetaitereíma oiko asy. Mburuvichakuéra ombyaty imba’eränte ha hesarái umi imboriahuvévagui. Péichante ágä peve.
Stroessner okúirö upe 1989-pe ha’etevaichava’ekue ára pyahu hesakätaha ñane retäme ha ñane retäyguárape guarä. Oje’eva’ekue upérö opataha tukumbo ha ñemonda. Avei jeiko poräve ohupytytaha enterovéape, ndaha’éi matamáta kuetépente.
Jeiko poräve he’ise oñeñangareko poräve ñande salúre, oñembo’e poräve mitäme eskuelaháre, ñamba’apoha, ñande rape poräveha, ñande róga ñane mba’e teeha, jakaru poräve ha javy’aveha ñane retäme.
Ojapomarö jepe 25 áño Dictador ho’ahague, ágä peve hetaiterei ñande rapichápe ojopýnte gueteri tekotevë asy. Nda’éi aína Stroessner tiémpope jaiko porävehague. Nahániri. Oïrö ha’e hetánte aveiva’ekue mboriahu ha hi’ári ha’e ñande apresa ñande apresaseha óra, ñande jukauka, ñande tortura, ñanemosë ñane retägui ha oñesupehëva, oheréiva ipónte oiko porä.
Arémarö jepe ko demokrásia ñane moirü hetamba’e gueteri ofalta chupe hi’aju haguä. Hi’ajúne jaiko porävérö, ipopotïro mburuvicha ha omba’aporö hikuái tetä omopu’ä haguä ani hyekuéra omongakuaave haguänte.
Hi’äma, hasypeve, osë ára pyahu añetéva ha enterotéva jaiko poräve ñane retäme.
