Oï niko ñande apytépe ojupíva oipytyvö haguä hetäme ha katu, amo ipahápe, oñepypytyvö ha’e, oipytyvö ita’ýra, itajýra, hembireko ha isosiokuérapente.
Jahecha jaikóvo mba’éichapa Parlamento ha ambue instituciones públicaskuérape ojepuru ñande pláta oñembohetave haguä empleado publicokuéra. Umívape ñande japaga isuéldo japagágui impuésto.
Umi oïva yvate, oguerekóva poder, oñembokokuete Estado kokuére. Oipuru imba’ekuérarö guáicha. Omoinge omoingeséva, ome’ëuka chupekuéra suéldo kyra kyra.
Upe aja katu heta ñane retäygua okarúröntema okarúva, imboriahuetevéva oïgui oisyrykupáva umi imba’ekuéra rängue.
Ojepurúgui hendape’ÿ pe viru Ministerio de Hacienda ombyatýva impuestokuéragui ndajaguerekói hetave hospital, noñemyatyröi eskuelakuéra ochororopáva okyvove ha ndojasfaltái ñande rape jaju ha jaha pya’eve haguä opa rupi.
Ä mba’e he’isehína Paraguay imboriahuveha oïgui jatevuita ohuguy’óva chupe, okambúva hese ára ha pyhare.
Agä jatevukuéra réra osëmba oikóvo. Ha ojetyvyro hikuái. Peichanteva’erävoi. Hi’ä ko oikóva ndopareíri pe téra jekuaápente. Hi’ä hasypeve oñandumi avei hikuái ojapórö ojapo’ÿva’erä ndopytareíriha. Jahechase ojekastigamírö omomboriahuvéva Paraguay.
