Umi parlamentariokuéra niko noĩri senador térã diputádorõ ijehegui rei. Oĩ upépe ojevotágui hesekuéra ojapo haguã ñane retã raperã léi rupive ha oñangareko haguã enterovéa mba’ére. Ha’ekuéra oĩ ñande rekovia Congreso-pe.
Upéicha rupi mba’e ojapóva hesakã ha ojekuaava’erã. Ndaikatúi oguerokirĩrĩ térä oguerokañy mba’eve ojapoháicha hína ko’ägä omotenondéva Cámara de Diputados, Juan Bartolomé Ramírez, ha Cámara de Senadores, Julio César Velázquez. Ijekuaapyrä mosarambiha Última Hora niko ojerure chupekuéra omombo’u haguä mba’éichapa héra umi omba’apóva Parlaméntope ha mbovýpa hikuái.
Tetäygua oikuaava’erä mba’épepa ha mba’éichapa ojepuru iviru. Okirïrïrö parlamentariokuéra, ikatu ja’e ndoipuruiguiha hína ñande pirapire hekopete, oguerekoguiha iky’áva ndoipotáiva ojekuaa. Oiméne ra’e omoinge ita’ýra, itajýra, ikorreli térä ambue hekope’ÿ Parlaméntope. Ha oñomise kirïrï guýpe ku yty oñeñomiháicha alfombra guýpe.
Ko kirïrï he’ise nomomba’eieteha omoïva’ekue chupekuéra pe oïhápe hikuái. Ojapoha ojaposéva. Ha ohovapeteha ñande Léi Guasu he’íva, ijartíkulo 28-pe, tetänguéra remisambyhyha oikuaaukava’eräha jekuaapyrä oïva ipopekuéra. Ä okirïrïva rehe ndaikatúi jajerovia.